CarPan: Ethina Mate

 

Oleh: Kamalir Rosyid*

 

            Odhi’ niko gun agabhay careta, careta bunga otaba careta sossa kabbi pon badha se ngaraksa ban tanto ta’ bakal lopot dari takdirra Se Kobhasa, kadiya caretana settong oreng lake’ se odhi’ kathibi’ e settong disa.Oreng seppo due’na pon padha tadha’ kabbi. Ebhu’na  dutaon lebbi ngadebbi panyake’ TBC  se saengga asabhab-agi adinggal dunnya. Olle lema are dhari kamateana ebhu’na pas bhapa’na mole kaangguy nyare bini pole, saengga lalake’ roa odhi’ kathibi’ amarga oreng seppo due’na pon padha tadha’. Nape pole kaena ban nyaena se lakar pon tadha’ lambha’.

            Oreng lake’ roa anyama Atnawi, omorra 15 taon ejalani. Ampon deddi takdirra Atnawi arangke’ careta odhi’na se berre’, masala se eadeppih banget rajhe mon ebanding kalabhan omorra se gi’ bisa ekoca’ ngudha, tantona mentalla se gi’ keni’ roa ta’ bakal kellar mekol masala odhi’na.

            E tina-agi reng seppo banni masala biasa, tape bisa tetthi masala se bakal bennya’ ngoras aeng mata, nape pole e tina mate reng seppo bine’ se pon sanggup arabhat abha’ molae dhari odhi’ e dhalem kandhungan sampe’ akherra apesa dhari kaodhi’an. Mangkana bhula ban dika wajib hormat ban taat dha’ oreng seppo due’ tor se paleng otama reng seppo bine’. Tanto akor kalaban dabuna Nabi bhakto badha settong shahabat se atanya da’ nabi pasera se kodu e hormat lebbhi dullu, Nabi ajawab ebhu’ sampe’ tello kale pas dhibhudhina ajawab bhapa’. Ganiko anandaagi ja’ ebhu’ niko aropaagi oreng se paleng esto dha’ ana’.

            Pola amarga ebhu’na gi’ ekapolong e dunnya annya’ manussa se ta’ aromasa jha’ estona ebhu’ banget rajha ban jau lebbi rajha dhari estona ana’ da’ ebhu’na. Tape pagi’ bakal ekarassa nalekana ebhu’na pon nyingla dhari setthi’na  kaangguy salanjangnga, tanto tor paste ate ta’ bakal narema. Padha ban se ekarassaagi Atnawi sanonto. Seang malem tedung asapo’ sossa abantal aeng mata, arassa kasta amarga ta’ sempat mabunga reng seppona bhakto apolong gi’ odhi’na, bhali’ ngakoe jha’ segghut ta’ atoro’ dha’ oca’na ban ajaui lang-langanna.

            Du jam lebbi Atnawi toju’ e penggirre koburenna ebhu’na samba nangis sesegunan “Bhu’, abhali bhu’, sengko’ la kerrong bhu’” aeng matana se ngalocor ka pepena egusot dhari lengngenna se pon becca aeng mata dhari abitteh nangis. ATnawi apangrasa kaelangan barang se paleng ekaemani dalem odhi’na.

            Pokol 6 eppas adzan maghrib pon ekaeding e jauna. Atnawi mole samba mekol rassa sossa se katara. Olle saminggu dhari kapateanna ebhu’na Atnawi paggun ta’ tobhang entar ka koburanna ebhu’na sabban sore sampe’ adzan maghrib. Pamolena dhari koburan Atnawi paste nangis amarga pae’nna rassa kaelangan se ekalodhu’ ta’ bu-ambhu.

            Settong are sampe’ adzan maghrib Atnawi  paggun ju’ toju’  epenggirre koburanna ebhu’na. Arassa abha’na pon ta’ koat pole sabban are nanggung loka se adhara aeng mata. Odhi’na gun akadiya barang  mate se tadha’ gunana ban ta’ tao sampe’ bile rassa sossa roa bakal bisa ekaloppa. Atnawi bhuru ka gunung agandu’ arep bakal nemmu cara sopaja atemmu bhan ebhu’na maske gun ngaton e pekkeranna. Tape tada’, se badha gun calemothan, pekkeranna petteng. Akherra Atnawi aniat kaangguy apate tibhi’ sakale katembang sabban are nanggung sossa se ta’ mare-mare.

            Atnawi ajalan ka attas gunung nyorsor ka rombhuna alabhan petteng sopaja tadha’ oreng se bakal ngataoe. Dhapa’ ka seppena Atnawi ngala’ rabhet se cokop koat kaangguy agantong tibhi’. Rabhet roa pon siap nyekkel le’erra, gun kare mamaso’ cethagga ka rabhet se e pagattng ka ka’bungka’an.

            Teppa’ rabhet pon maso’ ka le’erra Atnawi, kalbhan ta’ e ka sangka rabhettah gaggar pas tetthi olar se abhulet serret dha’ bandanna Atnawi, saengga Atnawi robbu ta’ bhisa aguli, amarga due’ tanangnga padha tapengkot ebhukkala ta’ bisa. Atnawi acerreng ranyeng, tape gun parcoma ta’ bakal badha se ngaedhing. Niattha kaangguy apate tibhi’ elang nyakalean agante rekong ban tako’ padha badha, etambhai pole tako’na ningale cethagga olar eadha’anna, se pon siap nyolpe’ muana Atnawi.

            Amarga pon alabhan, akherra Atnawi pasra ban ambhu ta’ acerreng pole. Matana metthem rapet parana, tape gettonna olar roa ta’ endha’ ngikke’ molae gelle’. Pas se lebbhi magetton pole olar roa bisa acaca. Eppas eada’anna muana Atnawi kalabhan basa Madureh olar roa ngoca’ “tadha’ manussa se odhi’ langgeng e alam dunnya. Kabbi bakal abhali dha’ Se Acepta .” “odhi’ rea ta’ kera senneng salanjangnga ban ta’kera sossa saterrossa. Sabab badhana se due’ jhareya, rassa senneng ban sossa, bisa thetthi tora pangokor antara sabbar ban sokkor” olar roa neg-eneng sakejjha’ngabhas Atnawi se pon pote olay polana rassa tako’ ban getton pon acampor. Pas olar nerrossagi cacana “e bhakto neng-sennenga, ba’ badha’a rassa sokkor e dhalem atena ba’na? ban e bhakto sossana ba’ badha’a rassa sabbar narema e atena ba’na?” “saongguna masala se eadebbi ba’na sate area aropa’agi ujien dhari Pangiran se kodu kalabhan ate se cellep otabha sabbar narema, bhanni pas etina’agi apa pole eadebbi kalabhan cara se sala enga’ jereya.”

            Ngaedingagi cacana olar roa molae gelle’ Atnawi mekker pole ban aromasa jha’ se elakoni abha’na ongguna sala. Atnawi metthem pole e paserret, rassa kasta pon tombhu e dhalem atena. Temmu-temmu olar roa malorga bhuletthanna ban coplak dhari badanna Atnawi amarga badha soara samar-samar se ekaeding ngolok dhari jauna. “Atnawi.. Atnawi..” Atnawi pas mella’ ngabhas paesanna koburanna ebhu’na se ekagabay sandharan cethaggah molae gelle’ “malem lah, mara mole galluh, tina jha’ kose bit-abit tangise, cokop du’agi baih ebhu’na olle cellep ban tera’ e dhalem kobur” Bibbi’na Atnawi ajagai Atnawi se saongguna molae gelle’ tatedung toju’ e penggirreh koburanna ebhu’na. Atnawi pas sadhar ban ngaenga’e mimpena se gi’ buru roa. Akherra Atnawi mole abareng Bibbi’na samba aniat dhalem atena kaangguy ngajum pekker se pon cerkalacer, sopajha bisa tettep sabbar ngadebbi masala odhi’na se seggut nyanther.

Annuqayah, 28 Februari 2020

 

 

 

*Kamalir Rosyid, lahir e disa Banjar Bara’ Gappora Songennep. Santre Annuqayah alumni Al-In’am ban aropaagi Mahasiswa INSTIKA Luk-guluk Songennep.